Gonjang Ganjinge Jagad

Jagad lagi geger amarga ana sawijine kahanan kang marakake resahe umat manungsa. Ora among sak wilayah, apa maneh mung sak desa, nanging nglibatake uwong sak dunya. Meh kabeh negara ngrasakake kahanan iki. Kahanan kang bisa diarani pageblug iki disababake dening infeksi saka salah sijine virus kang sinebut virus corona. Jagad internasional wis sepakat nganggo jeneng Covid-19 (Coronavirus Disease 19) kanggo nyebut virus iki. CO kanggo corona, VI kanggo virus, lan D iku kanggo disease (penyakit). Ewoh dene angka 19 kuwi minangka taun muncule virus iki yaiku taun 2019. Para ahli kesehatan ngaturake yen virus corona dumadi saka kalong/lawa sing diemplok dening warga Cina. Senajan sak tenane lawa kui ngandhut racun kang maneka rupa.
Njur apa sing dadi gonjang ganjinge dunya amarga virus iki? Perlu dimangerteni yen virus iki bisa njangkiti wong liya utawa wabah kang bisa nular. Tinulare virus iki ora amung lewat sesenggolan utawa demok kotorane kewan. Nanging kanga aran virus corona iki isa uga jumangkit lantaran watuk wahinge wong kang wis ketatrapan virus. Mula saka kuwi, nyebare wabah iki klebu cepet. Yen dilangsir saka https://www.cnnindonesia.com, nganti dina Rebo, 25 Maret 2020, kamaka ana 790 kasus sing wis kedaden, 58 wong dinyatakna kelangan nyawa, lan 31 wong dinyatakna sehat
Nalikane dipikir kanthi nalar sing jangkep, nyebar lan njangkite virus corona iki dudu perkara kang sepele. Apa maneh kasus wabah corona iki wis ngambah ing saben negara lan ditetepake dadi isu global. Ora mung Indonesia kang dadi dumadakan repot nangani kasus iki, nanging negara maju kayata Amerika, Italia, lan Australia uga kapetung rebyek anggone nanggepi lan nangani. Nganti ana tanggal 11 Maret 2020, Paguyuban Kesehatan Internasional (WHO) netepake corona wis dadi pandemic, yaiku pageblug kang wis nyebar teka endi-endi lan wayah dumadine uga bebarengan. Pemrentah ya langsung ngetokake kebijakan amrih rakyate ora saya akeh sing kejangkit.
Corona ora bisa dianggep enteng. Arepa wong mlarat, sugih, pejabat, rakyat, polisi, tentara, klebu dokter ya tetep ana potensi ketatrapan virus iki. Awake dhewe mangerteni yen tamba utawa vaksin kang yekti ampuh kanggo nambani corona iki durung ketemu. Tenaga kerja saka tim medis uga repot banget anggone ngrumat pasien sing wis didakwa positif ngidhap corona. Arep madhang, ngombe, lan mbuwang hajat wae kangelan amarga yen wis nganggo hamzat (ageman sing aman nalika dokter nambani pasien corona) ora kena sukur dienggo lan diganti. Ngageme mung sepisan, rampung tumandang ya enggal dinetralisir banjur diobong. Ora kena dienggo maneh.
Mula saka kuwi, sing luwih ati-ati anggone nglakoni aktivitas. Dikalongi anggone metu dolan utawa kumpul ingkang kurang migunani. Masarakat kudu tansah njaga kesehatane, nganggo hand sanitizer lan masker yen arep lelungan neng endi wae. Diakehi anggone ngombe banyu yen isa banyu wedang sing anget. Yen perlu saben isuk ndede srengenge, amarga virus corona ora tahan nalika kepetuk karo hawa panas. Ditrapake anggone nglakoni social distancing (jaga jarak) paling ora rong meter. Senajan durung karuan positif ngidhap corona, tumindhaka kaya-kaya wis kejangkit. Lire ora liya supaya wong liya kang kinasih bisa luwih kejaga saka infeksi sing nular iki. Amarga awake dhewe ora ngerti sapa sing wis kejangkit endi sing durung. Tansah eling marang Gustine, dedunga mugi tansah pinaringan wilujeng nir ing sambikala.

Kediri, 26/3/2020

Oleh : Fathur Roziqin